चालू घडामोडी (3 ऑगस्ट 2016)
आंतरराष्ट्रीय आयएलओ स्पर्धेत आलोक साठेला ब्राँझपदक :
- भाषिक कौशल्याची आणि ज्ञानाची कसोटी पाहणाऱ्या महत्त्वाच्या अशा आंतरराष्ट्रीय लिंग्विस्टिक ऑलिंपियाड (आयएलओ) या स्पर्धेत पुण्यातील आलोक साठे या विद्यार्थ्याने सलग दुसऱ्यांदा ब्रॉंझपदक पटकाविले.
- म्हैसूर येथे ही स्पर्धा पार पडली, तब्बल 32 देशांतील 180 स्पर्धकांनी या स्पर्धेत भाग घेतला होता. त्यात आलोकने ही नेत्रदीपक कामगिरी केली आहे.
- वैयक्तिक आणि सांघिक कामगिरीच्या आधारावर अंतिम निकाल लावण्यात आला.
- भारताच्या दोन संघांतील एकूण आठ विद्यार्थ्यांमधून आलोकने हे पदक मिळविले आहे.
Must Read (नक्की वाचा):
चीन जनुकीय संपादनाची चाचणी करणार :
- चिनी वैज्ञानिकांनी जगात प्रथमच जनुकीय संपादनाची चाचणी माणसांवर करण्याचे ठरवले आहे.
- तसेच या महिन्यात फुफ्फुसाच्या कर्करोगावर उपचारासाठी जनुकीय संपादनाची चाचणी करण्यात येणार आहे.
- चेंगडू येथील सिनचुआन विद्यापीठाच्या वेस्ट चायना रूग्णालयात हा प्रयोग केला जाणार असून यात सीआरआयएसपीआर (क्रिस्पर) – कॅस 9 या तंत्रज्ञानाच्या मदतीने जनुकीय संपादन करून त्या पेशी पुन्हा रूग्णाच्या शरीरात सोडल्या जाणार आहे.
- क्रिस्पर या तंत्रज्ञानाचे पूर्ण नाव ‘क्लस्टर्ड रेग्युलरली इंटरस्पेस्ड शॉर्ट पालिनोड्रॉमिक रिपीट्स’ असे असून 2015 मध्ये या तंत्रज्ञानाचा उल्लेख महत्त्वाचा शोध म्हणून अमेरिकेच्या ‘सायन्स’ या नियतकालिकाने केला होता.
- तसेच या तंत्रज्ञानाच्या मदतीने जनुकीय भाग संपादित करून त्यात डीएनएचे नवीन धागे टाकले जातात.
भारतीय कंपन्या चीनच्या तुलनेत अधिक कार्यक्षम :
- चिनी कंपन्यांच्या तुलनेत भारतीय कंपन्या अनेक बाबतीत वरचढ असल्याचे ‘एस अँड पी ग्लोबल रेटिंग्स’ या संस्थेच्या अहवालातून समोर आले आहे.
- पायाभूत सुविधा मिळण्यात भारतीय कंपन्यांना काही अडचणी असल्या, तरीदेखील या कंपन्या कार्यक्षम आणि गुणवत्तायुक्त असल्याचे अहवालात म्हटले आहे.
- तसेच याबाबत अधिक माहिती देताना संस्थेचे विश्‍लेषक मेहुल सुक्कावाला यांनी सांगितले, की या अहवालासाठी भारतातील आघाडीच्या 200 कंपन्यांचा अभ्यास करण्यात आला.
- यामध्ये संबंधित कंपन्यांची चीनमधील स्पर्धक कंपन्यांशी तुलना केली असता, चीनमधील कंपन्यांमध्ये सरकारी हस्तक्षेप मोठ्या प्रमाणावर आढळला.
- यामुळे कंपन्यांना मुक्तपणे काम करण्यात अडचणी येत असून, भारतीय कंपन्याच त्यांच्यापेक्षा वरचढ ठरत असल्याचे त्यांनी सांगितले.
रिओ ऑलिम्पिकसाठी रशियाच्या वेटलिफ्टिंग संघावर बंदी :
- आठ खेळाडूंचा समावेश असलेल्या रशियाच्या वेटलिफ्टिंग संघाला रिओ ऑलिम्पिकमध्ये सहभागी होण्यास मनाई करण्यात आली आहे.
- उत्तेजक सेवनाला प्रोत्साहन देत असल्याच्या आरोपांवरून आंतरराष्ट्रीय वेटलिफ्टिंग संघटनेने (आयडब्ल्यूएफ) त्यांच्यावर बंदी घालण्याचा निर्णय घेतला आहे.
- आतापर्यंत रशियाच्या एकूण 117 खेळाडूंवर बंदी घालण्यात आली आहे. त्यामध्ये अ‍ॅथलेटिक्समधील 67 खेळाडूंचा समावेश आहे.
- रशियाने रिओसाठी 387 खेळाडूंचे पथक जाहीर केले होते.
- उत्तेजक प्रकरणांमुळे रशियावर सरसकट बंदी घालावी, अशी मागणी अमेरिका, कॅनडा यांच्यासह अनेक देशांनी केली होती.
- मात्र रशियाला जागतिक स्तरावर असलेले मोठे स्थान लक्षात घेऊन आंतरराष्ट्रीय ऑलिम्पिक समितीने त्यांच्यावर सरसकट बंदी न घालण्याचा निर्णय घेतला आहे.
रिझर्व्ह बँकेच्या गव्हर्नरची मुदत चार वर्षे असावी :
- अमेरिकेतील फेडरल रिझर्व्हच्या गव्हर्नरची मुदत चार वर्षे आहे, तर बँक ऑफ इंग्लंडच्या गव्हर्नरचा कालावधी आठ वर्षांचा असतो.
- जगभरात सर्वत्र मध्यवर्ती बँकेच्या गव्हर्नरची मुदत पाच ते सहा वर्षे असून, भारतातही रिझर्व्ह बँकेच्या गव्हर्नरची मुदत चार वर्षे करावी, अशी मागणी काँग्रेसचे सदस्य राजीव शुक्ला यांनी राज्यसभेत केली.
- शून्य प्रहरात हा विषय उपस्थित करताना ते म्हणाले की, रघुराम राजन यांच्याबाबतीत उलटसुलट विधाने करून सत्ताधारी पक्षाच्या नेत्यांनी गोंधळ घातला.
- भारतात रिझर्व्ह बँकेच्या गव्हर्नरची मुदत तीन वर्षे असून, त्यांना आणखी एकदा मुदतवाढ देण्याची तरतूद आपल्याकडे आहे.
- अन्य देशांप्रमाणे पाच ते आठ वर्षे गव्हर्नरचा कालावधी ठरवणे शक्य नसले तरी ती मुदत किमान चार वर्षे करणे योग्य ठरेल.
दिनविशेष :
- 1900 : फायरस्टोन टायर कंपनीची स्थापना.
- 1946 : अमेरिकेत नॅशनल बास्केटबॉल असोसिएशनची स्थापना.
- 1956 : बलविंदरसिंग संधू, भारतीय क्रिकेट खेळाडू जन्म दिन.
- 1957 : देवदास गांधी, हिंदुस्थान टाइम्सचे संपादक व महात्मा गांधींचे सुपुत्र यांची पुण्यतिथी.
- 1960 : नायजरला फ्रांसपासून स्वातंत्र्य.
चालू घडामोडी PDF स्वरुपात मिळविण्यासाठी येथे क्लिक करा